हेटौंडा–मकवानपुरमा पछिल्लो २४ घण्टामा २ सय ६६ जनामा पीसीआर र एन्टिजेन परीक्षण गर्दा थप ८४ जनामा कोरोना पुष्टि भएको स्वास्थ्य कार्यालय मकवानपुरले जनाएको छ । पुष्टि हुनेहरुमा सबभन्दा बढी ५३ जना हेटौंडा उपमहानगरका छन् ।
मनहरी गाउँपालिकाका ११ जना, थाहा नगरपालिकाका ७ जना, इन्द्रसरोवर गाउँपालिकाका ६ जना, कैलाश गाउँपालिकाका ३ जना, भीमफेदी गाउँपालिकाका २ जना, मकवानपुरगढी र राक्सिराङ गाउँपालिकाका एक÷एक जना रहेको कार्यालयले जनाएको छ । यससँगै जिल्लामा कोरोना पुष्टि हुनेको संख्या १२ हजार २ सय ३१ पुगेको कार्यालयले जाएको छ ।
जिल्लाका पालिकामध्ये सबैभन्दा धेरै कोरोना संक्रमित भएको पालिकाका रुपमा हेटौंडा उपमहानगरपालिका छ । केही दिनसम्म संक्रमितको संख्यामा कमी आए पनि पछिल्लो समय कोरोना संक्रमितको संख्या बढ्दै गएको हेटौंडा उपमहानगरपालिका जनस्वास्थ्य निरीक्षक भोला चौलागाईंले बताए ।
पछिल्लो २४ घण्टामा जिल्लामा थप १ सय ३ जनाले कोरोना जितका छन् । यससँगै जिल्लामा हालसम्म कोरोना जित्नेको संख्या ११ हजार ४ सय ७१ पुगेको छ । जिल्लामा हालसम्म कोरोनाको कारण १ सय ३७ जनाको मृत्यु भएको छ । जिल्लामा ५ सय ७९ जना सक्रिय संक्रमित उपचाररत् छन् । जसमा ५ सय २६ जना घरमा र ५३ जना संस्थागत् आइसोलेसनमा उपचाररत् रहेको स्वास्थ्य कार्यालय मकवानपुरले जनाएको छ ।
कोरोना भाइरस संक्रमणका कारण हेटौंडा अस्पतालमा उपचाररत् थप १ जनाको मृत्यु भएको छ । मंगलबार विहान १ महिलाको मृत्यु भएको अस्पतालले जनाएको छ । मृत्यु हुने धनुषा जिल्ला स्थायी ठेगाना भएकी ५५ वर्षीया हुन् । उनको मंगलबार विहान साढे ४ बजे मृत्यु भएको अस्पतालका सूचना अधिकारी राजीव झाले बताए ।
मंगलबार अस्पतालमा २८ जना कोरोना संक्रमित उपचाररत् रहेको उनले बताए । जसमा १४ महिला छन् । उपचाररत्मध्ये ५ महिला संक्रमित आईसीयुमा, ७ महिला संक्रमित एचडीयुूमा र २ जनासमेत गरी ७ जना संक्रमित आकस्मिक कक्षमा उपचार गराइरहेका छन् । अस्पतालबाट मंगलबार ७ जना डिस्चार्ज भएका छन् । जसमा ४ जना रहेको अस्पतालले जनाएको छ ।
