०५ श्रावन बारा । बारा प्रहरीले नक्कली नेपाली नोटसहित १ जनालाई पक्राउ गरेको छ । विशेष सूचनाको अधारमा ईलाका प्रहरी कार्यालय सिमरौनगढ बाट खटिएको प्रहरीको टोलिले सिम्रौनगढ नगरपालिका वडा नं. २ महुवाही बस्ने वर्ष ३५ का छठु गिरीलाई पक्राउ गरेको हो ।
बिहीबार प्रहरी निरीक्षक नविन राईको कमाण्डमा खटिएको टोलीले महुवाहीस्थित सडक खण्डमा महुवाहीबाट नयकाटोल तर्फ जाँदै गरेको ‘अन टेस्ट’ बाइकमा नक्कली नोट ओसार पसार भइरहेको फेला पारेको थियो । गिरीको साथबाट नेपाली रु. १ हजार दरको पचासी हजार बरामद भएको जिल्ला प्रहरी कार्यालय बाराले जनाएको छ ।
गिरीविरुद्ध खोटा मुद्रासम्बन्धी कसूरमा मुद्दा दर्ता गरी जिल्ला अदालतबाट दिन ८ म्याद थप गरी आवश्यक अनुसन्धान भइरहेको प्रहरीले शुक्रबार जानकारी गराएको छ ।
