नवलपरासी, पुस १९ । पश्चिम नवलपरासीको नेपाल-भारत सिमानाकाबाट तस्करी गराउने सुस्ता गाउँपालिका र प्रतापपुर गाउँपालिकाका जननिर्वाचित वडा अध्यक्षहरु नै तस्कर रहेको तथ्य बाहिरिएको छ । नेपालबाट भारत र भारतबाट नेपाल तस्करी गराउनेमा सुस्ता गाउँपालिका – ५ का वडा अध्यक्ष प्रभु यादव र प्रतापपुर गाउँपालिका – ५ का वडा अध्यक्ष रमेश कानु बानियाँ रहेको तथ्य बाहिरिएको हो ।
उनीहरुले बिगतदेखि नै तस्करी गरिरहेको स्थानीयहरुले बताएका छन् । स्थानीयबासीको भनाई अनुसार, तस्करहरुको नाम लिनु पर्दा सुस्ता गाउँपालिका र प्रतापपुर गाउँपालिकाको वडा नम्बर – ५ का वडा अध्यक्ष रमेश कानु बानियाँ र प्रभु यादव मुख्य रहेको बताए । जननिर्वाचित वडा अध्यक्ष भईसकेपछि पनि आफ्नो सहयोगी राखेर तस्करीलाई निरन्तरता दिईरहेको आरोपसमेत स्थानीयले लगाए ।
प्रतापपुर गाउँपालिका – ५ का वडा अध्यक्ष बानियाँले झन आफ्नै सहोदार भाई हृयेन्द्र कानु बानियाँलाई जिम्मेवारी दिएर महिनामा करोडौंको तस्कर गराईरहेको तथ्य फेला परेको छ । यस्तै अन्य तस्करहरुमा मोहबद र भक्तिपुरका अनिल गुप्ता, बिरेन्द्र यादवसमेत रहेको एक जना स्थानीयले नाम नखुलाउने शर्तमा बताए । स्थानीयहरुले नेपालबाट भारत र भारतबाट नेपाल तस्करी गराउने धन्दा रोक्नसमेत आग्रह गरे ।
उनीहरुले कवाडको नाममा गाँजा, चरेस, तामा, पित्तल, स्टिल, चाइनाबाट आउने रुइ, टायर ट्यु, जडिबुटी, भुटानी माटो, गहुँ, केराउ, चिनी, टायल, ब्रोइलर कुखुरा, खसीबोका, राँगाभैसीको तस्करी गरिरहेको स्थानीयहरुले जानकारी दिए । सोही जानकारीको आधारमा यस अनलाईनका टिम स्थलगत रिपोर्टिङमा जाँदा कवार्ड कारोबारको नाममा अबैध सामान गाँजा र चरेस र भुटानी माटोकोसमेत तस्करी गरिएको भेटिएको छ ।
सोही क्रममा हाम्रो टिम भक्सिपुर र बुदन्तवापुरको गोदाममासमेत स्थलगत रिपोर्टिङमा पुग्दा स्थानीयले दिएको जानकारी अनुसार कारोबार भईरहेको प्रमाण फेला परेको छ । तस्करहरुले रातीको ११ बजेदेखि २/३ बजेसम्ममा नेपालदेखि भारत र भारतबाट नेपाल सामान ओसारपसार गर्ने गरेको पाइएको छ । तस्करहरुले विभिन्न सिमानाकाबाट तस्करी गरिरहेको छ । यस बिषयमा सुस्ता – ५ र प्रतापपुर – ५ का वडाअध्यक्षहरुलाई हामीले सम्पर्क गर्न खोज्दा सम्पर्कमा आउन चाहेनन् ।
प्रतापपुर गाउँपालिका – ५ का वडा अध्यक्ष रमेश कानु बानियाँ गत स्थानीय निर्वाचनमा जनता प्रगतिशिल पार्टीका उम्मेदवारलाई पराजित गरी राप्रपाबाट निर्वाचित वडा अध्यक्ष हुन् । भने, सुस्ता गाउँपालिका – ५ का अध्यक्ष प्रभु यादव एमालेका उम्मेदवार दिपक जोशीलाई पराजित गरी कांग्रेसबाट निर्वाचित वडा अध्यक्ष हुन् ।सभार नवलपुर टुडे डटकम l
