१२ पौष ।सिमरा : बारा जिल्लाको जीतपुरसिमरा उपमहानगरपालिका वडा नं. १८ बडहर्वामा पौष २५ गते देखि मौवादेवी कृषि, सांस्कृतिक तथा पर्यटन व्यापार महोत्सव हुने भएको छ । ‘पर्यटन कृषि र प्राकृतिक सौन्दर्यको सहर, समृद्ध सांस्कृतिक जीतपुरसिमरा नगर’ भन्ने नाराकासाथ पुष २५ गतेदेखि माघ ७ गतेसम्म महोत्सव हुन लागेको हो आयोजकले शुक्रबार पत्रकार सम्मेलनको आयोजना गरेर जानकारी दिएको छ ।
महोत्सवले बडहर्वालाई राष्ट्रिय स्तरमा चिनाउनुका साथै स्थानीय स्तरको कृषि, उद्यम, कला, संस्कृति, पर्यटन, खेलकुदको प्रवद्र्धन गर्ने अपेक्षा आफूहरुले राखेको मौवादेवी युवा क्लबका अध्यक्ष निर्मल यादवले जानकारी दिनुभयो । मौवादेवी क्लबको खेल मैदानमा आयोजना हुने महोत्सवमा स्थानीय स्तरका व्यापार, व्यवसाय, कृषि, उद्यमका साथै विभिन्न समुदायको खानाको परिकारलाई प्रवद्र्धन गर्न करिब एकसय वटा स्टल राखिने भएको छ । श्री मौवादेवी युवा क्लबको आयोजना तथा लालिगुराँस क्रेयचन मिडिया नेपालको व्यवस्थापनमा पहिलो पटक बडहर्वामा महोत्सव गर्न लागिएको हो ।
महोत्सवमा बालबालिकाका लागि बालउद्यान, राष्ट्रिय तथा स्थानीय कलाकारको सांगितिक प्रस्तुति रहने आयोजकले शुक्रबार पत्रकार सम्मेलन गरी जानकारी दिएको हो । यसैगरी महोत्सव अवधिभर प्रिति पासवान, राजा भोजपुरिया, अनु चौधरी, अन्जु कुश्मी, मिस्टर डी, एलिना चौहान, ज्योति मगर, दुर्गेश थापा, उर्गेन दोङ, बिशाल काल्ताङ, जीतु लोप्चन लगायतका राष्ट्रिय स्तरमा नाम चलेका कलाकारको उपस्थिती रहने क्रेयचन मिडिया नेपालका अध्यक्ष बिन्दास इन्द्रले जानकारी दिनुभयो ।१२ दिनसम्म आयोजना हुने महोत्सवमा स्थानीय कला र संस्कृतिलाई प्राथमिकताका साथ प्रवद्र्धन गर्ने लक्ष्य आयोजकले लिएको छ ।
महोत्सवको सम्पूर्ण आर्थिक व्यवस्थापन क्रेयचन मिडिया नेपालले गर्नेछ । क्रेयचनले मौवादेवी युवा क्लबलाई आर्थिक रुपमा सहयोग समेत गर्नेछ भने मौवादेवी खेल मैदान मर्मत र स्तरोन्नतिका कार्य समे गर्ने जनाएको छ । मौवादेवी युवा क्लबका अध्यक्ष यादवको अध्यक्षतामा सम्पन्न पत्रकार सम्मेलनमा क्रेयचन मिडिया नेपालका नारायण राजथला, नेपाल पत्रकार महासंघ बाराका सचिव पुष्पराज खतिवडा, जीतपुरसिमरा उपमहानगरपालिका वडा नं. १८ की वडासचिव सीमा उप्रेती लगायतको उपस्थिती रहेको थियो । कार्यक्रम आयोजक क्लबका सचिव मुकुन्द्रप्रसाद सापकोटाको सहजीकरणमा सम्पन्न भएको हो ।
